محمد نصر يعلق على منع دخول الكاميرات إلى "بتروسبورت"

انتقد المخرج، محمد نصر، تعامل مسؤولي ملعب “بتروسبورت” معه خلال تغطيته مباراة الأهلي والإسماعيلي، التي أقيمت أمس الجمعة في بطولة الدوري.

وقال نصر خلال مداخلة هاتفية على قناة “الحياة 2” في برنامج “الملاعب اليوم”: “مباراة أمس كانت مهمة لمتابعة جميع الشعب لها، مع اعتذاري بترو سبورت من أسوأ الملاعب التي عملت فيها ومعاملة غير أدمية، فلم نستطع الدخول حتى الساعة 8 إلا ربع”.

وأضاف: “دخلت الملعب بالعافية وظبطت الدنيا، واتفاجئت الساعة 9 المصور بيقول الحقني مش عارف اخش، رُحت له لاقيت لواء قالي لو خرجتله مش هتخش قلتله ازاي؟ مش هينفع طب والماتش.. قالي يولع الماتش”.

وواصل: “الناس اللي بتقارن التصوير والامكانيات بالامارات وغيرها هناك بيشتغلوا 22 كاميرا هنا ب 8 كاميرات وحامدين ربنا”.

واستأنف: “حتى الساعة 10 إلا ربع الناس كلها مستنية وانا لسه معملتش حاجة اقسم بجلال الله مارضيوا يدخلوا حد.. وأنا مش عارف أعمل ايه.. الماتش هيبتدي ومش معايا غير كاميرا واحدة بس بالمصور اللي قدر يخش”.

وأتم: “معرفتش أعمل ايه يعني.. اخش اقعد في نص الملعب اعتصم ومخليش الماتش يتلعب.. والناس بره اكيد عماله تشتم فيا عشان التصوير وانا كنت كاره نفسي وكنت هبطل شغل خالص”.